हरियाणातील सोनीपत येथील एका वृद्धाश्रमातील हृदय पिळवटून टाकणारी घटना समोर आली आहे. ७४ वर्षीय शिवचरण रामरतन गुप्ता यांनी आयुष्याचे शेवटचे दिवस वृद्धाश्रमात घालवले. ते दीर्घकाळ आजारी होते आणि अखेरच्या श्वासापर्यंत आपल्या तीन मुलींची वाट पाहत राहिले. मात्र, त्यांच्या प्रकृतीची माहिती वारंवार देऊनही एकही मुलगी त्यांना भेटण्यासाठी आली नाही. शिवचरण गुप्ता यांचे निधन झाल्यानंतरही मुली अंत्यसंस्कारासाठी उपस्थित राहिल्या नाहीत. त्यांनी व्हिडिओ कॉलद्वारेच वडिलांना अखेरचा निरोप दिला. या घटनेमुळे नात्यांमधील वाढता दुरावा आणि वृद्ध आई-वडिलांकडे होणारे दुर्लक्ष पुन्हा एकदा चर्चेचा विषय ठरले आहे.
शिवचरण रामरतन गुप्ता हे मूळचे महाराष्ट्रातील रहिवासी असून एकेकाळी ते मोठे कापड व्यापारी होते. सुमारे दीड वर्षांपूर्वी ते पत्नी मीना गुप्ता यांच्यासह सोनीपत येथील वृद्धाश्रमात राहायला आले होते. त्यांना तीन मुली असून मुलगा नव्हता. मुलींना उत्तम शिक्षण देऊन स्वतःच्या पायावर उभे करण्यासाठी त्यांनी आयुष्यभर मेहनत घेतली. काही काळापूर्वी पत्नीचे निधन झाल्यानंतर ते पूर्णपणे एकटे पडले. वृद्धाश्रमातील कर्मचारी आणि तेथील रहिवासीच त्यांच्या कुटुंबाप्रमाणे त्यांची काळजी घेत होते. प्रकृती दिवसेंदिवस खालावत असताना त्यांनी मुलींना शेवटचे पाहण्याची इच्छा व्यक्त केली होती.
वृद्धाश्रमाचे संचालक आनंद कुमार यांनी सांगितले की, सुमारे २० दिवसांपूर्वी शिवचरण गुप्ता यांची प्रकृती अधिक गंभीर झाली होती. त्यावेळी त्यांच्या तिन्ही मुलींना अनेकदा फोन करून परिस्थितीची माहिती देण्यात आली, मात्र कोणीही भेटण्यासाठी आले नाही. त्यांच्या निधनानंतर पुन्हा संपर्क साधून अंत्यसंस्कार थोडा वेळ थांबवण्याची तयारीही दर्शविण्यात आली, तरीही कोणाकडूनही येण्याची खात्री देण्यात आली नाही. मोठी मुलगी अनिता, जी नेपाळमध्ये शिक्षिका आहे, तिने ऑनलाइन ५,१०० रुपये पाठवून वडिलांचा अंत्यसंस्कार विधीपूर्वक करण्यास सांगितले. त्यानंतर तिन्ही मुलींना व्हिडिओ कॉलद्वारे संपूर्ण अंत्यसंस्काराची प्रक्रिया दाखवण्यात आली. इतकेच नव्हे तर नंतर अंत्यसंस्काराचा व्हिडिओही पाठवण्याची विनंती त्यांनी केली.
यानंतर समाजातील नागरिक आणि वृद्धाश्रमाशी संबंधित व्यक्तींनी मुलाची जबाबदारी पार पाडत शिवचरण रामरतन गुप्ता यांच्यावर संपूर्ण धार्मिक विधीनुसार अंत्यसंस्कार केले. सुरुवातीला मुलींनी अस्थी जतन करून ठेवण्यास सांगितले होते, मात्र नंतर त्यांच्याकडे येण्यासाठी वेळ नसल्याचे सांगत गंगेत अस्थी विसर्जित करण्याची जबाबदारीही वृद्धाश्रमालाच दिली. या घटनेने अनेकांच्या डोळ्यांत पाणी आणले असून सोशल मीडियावरही याची मोठ्या प्रमाणावर चर्चा सुरू आहे. आयुष्यभर मुलांसाठी कष्ट करणाऱ्या आई-वडिलांना वृद्धापकाळात एकटेपणा आणि उपेक्षा सहन करावी लागणे ही अत्यंत वेदनादायी बाब असून, ही घटना प्रत्येकाला आपल्या कौटुंबिक जबाबदाऱ्यांचा पुन्हा एकदा विचार करण्यास भाग पाडते.
